نورِ ایوانِ رضا

منقبت پاک بموقع عُرس حضور تاج الشریعہ علیہ الرحمہ

ہیں مرے تاج الشریعہ نورِ اَیوانِ رضا
اُن کی ذات پاک ہے شمعِ شبستانِ رضا

سیرت و کردار میں حقانیت کے ولولے
ان کے ہر رُخ میں دکھائ دیتی ہے شانِ رضا

جوہرِ خامہ وہی ، اور عشق کا جامہ وہی
دست ہے دستِ رضا ، دامن ہے دامانِ رضا

جیسے لَو ہوتی ہے روشن، شمع میں یا دیپ میں
یوں مرے تاج الشریعہ میں ہے لَمعانِ رضا

سینہ و قلب و جگر ، گنجینۂ علم و ہنر
قدّ و قامَت سَر بسَر مینارِ عرفانِ رضا

لہجہ و اُسلوب میں، عشق و غمِ محبوب میں
ان کا دیوانِ سخن ، ہے عکسِ دیوانِ رضا

یوں نکھارے مفتئ اعظم نے ان کے خدّ و خال
وہ سراپا بن گیے حُسنِ خیابانِ رضا

اُن کو پاکر کیوں نہ ہوں مسرور ہم اہل سنن
بالیقیں ان کی محبت میں ہے رضوانِ رضا

اہلسنت کے لیے راحت رساں ہر اک قدم
نجدیت کے واسطے ، شمشیر و پَیکانِ رضا

کر گیے سیراب ، ایمان و عقیدے کا چمن
باغ حق کو تازگی دی ، بن کے فیضان رضا

اہلِ حق ان کی عطا سے تا ابد سیراب ہوں
کررہے ہیں یہ دعا ، ہم سب غلامانِ رضا

حضرتِ عسجد میاں کا روئے تاباں دیکھیے
جلوۂ اختر ہیں یہ ، اور ماہِ تابانِ رضا

بخشی ہے سادات نے، نسلِ رضا کو روشنی
حشر تک مَدَّھم نہ ہوں گے اب چراغانِ رضا

کاروانِ اہلِ حق کی رہبری کے واسطے
رہنما بنتے رہیں گے جانشینانِ رضا

اے فرؔیدی جب کوئ پوچھے رضا کا رنگ و روپ
نامِ اختر پیش کردیجے ، بَعُنوانِ رضا