فنا فی خاتم النبیین ، امیر المجاہدین نور اللہ مرقدہ کی یاد میں تڑپتے ہوئے دل کی آواز
تو چل دیا تو آنکھ ہے گِریاں ترے لیے
سینے میں کیسے کیسے تھے ارماں ترے لیے
قربان اے مُحافظِ ناموسِ مصطفیٰ
ہستی کا سارا جوہر و ساماں ترے لیے
اے شانِ حق ، اے راحتِ اسلام و سُنیت
اب تٗو نہیں ، تو ہم ہوئے بے جاں ترے لیے
جی بھرکےتجھکو دیکھ سکے اور نہ سُن سکے
مُضطر ہے بزم ، اے مہ تاباں ترے لیے
ضربِ کلیم تھی تری تقریر کی دھمک
صد آفریں ! اے غازئِ میداں ترے لیے
تو نے نبی کے نام پہ ہنس کر سہے اَلم
گُل بن گیے تھے، شعلۂ زِنداں ترے لیے
آنکھوں میں آنکھ ڈال کے تٗو کفر سے لڑا
دائم دفاعِ حق رہا عنواں ترے لیے
عاشق نہیں، تو عشقِ سراپا نبی ﷺ کا ہے
روتے ہیں قلب و روحِ مسلماں ترے لیے
خادم حسین رضوی، امیر المجاھدین
ہیں غم میں سارے صاحب ایماں ترے لیے
تو دل کی دھڑکنوں میں رہا، آنکھ میں بسا
کیوں کر بہیں نہ اشکِ فَراواں ترے لیے
گلزارِ کائنات ہے پھیکا ترے بغیر
ہیں سارے گُل، تَپیدہ و سوزاں ترے لیے
اقبال کی خودی کا تو عکسِ جمیل تھا
غمگین ہے ادب کا دبستاں ترے لیے
فکر رضا کے ناشر و بے باک ترجماں
روشن ہوئے خزینۂ عرفاں ترے لیے
تو شاعروں کا خواب، تو اہل قلم کی فکر
افسردہ ہیں تمام سُخن داں ترے لیے
اے تاجدارِ ختمِ نُبوت کے جانثار
کونین کی زباں ہے ثنا خواں ترے لئے
اب بھی یقیں نہیں ہے تری موت کا ہمیں
دل منتظر ہے ہر گھڑی اے جاں ! ترے لیے
جانے کدھر سے وصل کی تنویر مسکراے
ہر سو نظر ہے جلوۂ جاناں ! ترے لیے
اے جانے والے ! دیکھ پلٹ کر پھر ایک بار
ہر سمت ہیں چراغ، درخشاں ترے لیے
اب بھی وہی ہجوم ، وہی دھوم ہے مگر
ہے ساری بزم ، اشک بَداماں ترے لیے
حُبِّ رسول پاک میں شعلوں پہ تو چلا
باغِ جناں عطا کرے یزداں ترے لیے
شاہا قبول ہوں یہ فرؔیدی کے ادنیٰ پھول
وہ لا نہیں سکا جو ہے شایاں ترے لیے
