اسلام کےعروج کاپرچم حسین ہیں
حقانیت کے نقشِ مُعظّم حسین ہیں
مہکی ہےجس سےصبروعزیمت کی کائنات
انسانیت کے وہ گُلِ اکرم حسین ہیں
پھیلی ہےشَشْ جِہاتْ میں سیرت کی روشنی
نورِ چراغِ محفلِ عالَم حسین میں
سُرخی ہےآسماں کے کناروں پہ اس لیے
اعداے دیں پہ آج بھی برہم حسین ہیں
جاری ہے ہر یزید سے اب بھی مقابلہ
حق کی ڈگرپہ سب سےمُنظّم حسین ہیں
ملتاہے اُن کے در سے نئی زندگی کا جوش
عزم و یقیں کےجلوۂ مُحکَم حسین ہیں
ذکرِحسین ، قوتِ مومن کا ہے سبب
تاحشر ایک جرأتِ پیہم حسین ہیں
دنیا حسینیوں پہ کرے لاکھ بندشیں
ہرکربلا میں فیض کے زمزم حسین ہیں
مایوسیوں میں حوصلہ دیتی ہے ان کی یاد
رنج و اَلَم میں صبر کے مرہم حسین ہیں
نام یزید ، ذلت و لعنت کا اک نشاں
چرخِ شَرَف کے نیّر اعظم حسین ہیں
حُبِّ حسینِ پاک ، مدارِ نجات ہے
یعنی کہ آخرت میں بھی ہمدم حسین ہیں
اُن کی ڈگر ، رضاے الٰہی کا راستہ
تفسیرِ” لِلَّتِيْ هِيَ أَقْوَمْ "حسین ہیں
ان کی حیاتِ پاک کا ہر باب لاجواب
بیشک دعاے نورِمجسم حسین ہیں
کردار میں ہیں صبروشجاعت کی جھلکیاں
خوے عَلِی و زہرا کے،سنگم حسین ہیں
اِس ماہ کو بھی نسبتِ شبیر پر ہے ناز
وجہِ وقارِ ماہِ مُحَرَّم حسین ہیں
ہوگی نہ کم ، فریدی ! ثنائے حسینیت
فکر و زباں پہ سب سےمقدم حسین ہیں
شَش جہات.. ہر طرف
محفل آدم.. نسل آدم، سارے انسان
جرأتِ پیہم ۔۔ مسلسل جوش وہمت
