بموقع یوم درود و سلام
٢٠ اپریل ٢٠١٩ع
بروز سنیچر
*تاریخ ولادت مصطفٰی صلی اللہ علیہ وسلم*
درود سلام پر میری دونوں نظمیں ٢٥، ٢٥ اشعار پر مشتمل ہیں اس کے دو سبب ہیں
(1) حدائق بخشش کی پہلی نعت پاک..
واہ کیا جود و کرم ہے شہ بطحا تیرا
اس میں ٢٥ اشعار ہیں
اسکے بعد اِسی زمین میں حضور غوث پاک کی تین منقبتیں
واہ کیا مرتبہ اے غوث ہے بالا تیرا
تو ہے وہ غوث کہ ہر غوث ہے شیدا تیرا
الاماں قہر ہے اے غوث وہ تیکھا تیرا
یکے بعد دیگرے ٢٥، ٢٥ اشعار پر مشتمل ہیں،
دوسرے حصے میں…
طلب کا منہ تو کس قابل ہے یا غوث
اِس زمین میں چار منقبتیں ہیں پہلی تین ٢٥، ٢٥ اور چوتھی ٢٤ اشعار پر مشتمل ہے مگر میری عقیدت کہتی ہے اِس میں بھی ٢٥ رہے ہونگے …
(2) اور دوسری وجہ یہ ہے کہ سیدی امام احمد رضا کی تاریخ وصال صفر کی ٢٥ ہے…
اِن دونوں نسبتوں کو ملحوظ رکھتے یہ اشعار ملاحظہ فرمائیں…
مصباحی فریدی
شانِ لوح و قلم درود و سلام
جانِ عرش و اِرم درود و سلام
حـکمِ پـروردگار صـلُّـوا علیہ
ہم پڑھیں دم بدم درود و سلام
بالیقیں سب سےافضل و اعلیٰ
ذکرِ شاہِ امم درود و سلام
بھیجتا ہے نبی پہ خود مولی
ایسا ہے محتشم درود و سلام
تاکہ دھڑکن بھی اُن کا نام جَپے
دل پہ کر لو رقم درود و سلام
جسمیں دیوانۂ رسول کو چین
عشق کا وہ حرم درود و سلام
یہ وظیـفـہ ہے قـوّتِ مـومن
ہونےدیگا نہ خَم درود و سلام
یـاد کر کے شـہِ دو عــالم کو
پڑھیےباچشمِ نم درود و سلام
زخمِ ہستی کا نسخۂ اکسیر
دافعِ رنج و غم درود و سلام
گلشنِ جاں میں راحتوں کی بہار
شـافئِ ہر اَلَـم ، درود و سـلام
دل غنی اِس کے پڑھنے والوں کا
سارا جاہ و حشَم درود و سلام
گر ہے صَلُّوا تو سَلِّمُوا بھی ہے
یعنی پڑھیے بَہَم درود و سلام
وہ دعــا مستَـجـاب ہوتی ہے
جسمیں ہوتاہےضَم درود و سلام
طاعتیں سب اِسی سے ہیں مقبول
طاعتوں میں اَتَم درود و سلام
بلکہ یہ ہے مُتَـمِّـمُ الاعمال
ہرعمل میں اہَم درود و سلام
قبر میں حشر میں یہ رکھےگا
عاصیوں کا بَھرَم درود و سلام
مشکلوں کےسبھی اندھیروں میں
ہے ضیاۓ کرم درود و سلام
آفتـابِ فـروغِ عِـزّ و وقـار
ماہتابِ نِعَم درود و سلام
جس نے تھاما بلند بَخت ہوا
عظمتوں کا عَلَم درود و سلام
ہر جھلک میں نیا اجالا ہے
نَو بہ نَو تازہ دَم درود و سلام
ہر طرف ہیں تجلیاں اِس کی
کیاعَرَب، کیاعَجَم درود و سلام
نجدیت لاکھ کوششیں کر لے
ہوسکے گا نہ کم درود و سلام
نغمـۂ حق ، صداۓ لاہُوتی
تحفـۂ محترم درود و سلام
کون سا رنج ہے جو دور نہ ہو
کیجیےپڑھ کے دَم درود و سلام
ہے فریدی یہ عاشقوں کی ادا
ہر سفر، ہر قدم درود و سلام
°°°°°°
مُتمِم الاعمال.. اعمال کو کامل و مکمل کرنے والا ،
MashaAllah