شہزادئ مصطفٰی ، مخدومۂ کائنات ، طیبہ ، طاہرہ ، عفیفہ ، شاکرہ ، صابرہ ، سیدة النساء ، خاتون جنت حضرت سیدہ فاطمہ زہرا رضی اللہ تعالی عنھا ،،، کی بارگاہ عالی جاہ میں خراج عقیدت …
وصال پاک ، ۳ رمضان المبارک ….
•••••••••••
شـہـزادئ سـلـطـانِ مـدینـہ ، زہرا
گلزارِ نبی کی گُلِ یکتا ،زہرا
رُخ ، ارض و سمٰوٰت کا انکی جانب
کونین کی ہیں قبلہ وکعبہ زہرا
اُس ماں سے ہے تعمیرِ کمال حسنین
حیدر کے شبستاں کی ہیں جلوہ زہرا
بـے مثل ہیں سرکارکی چاروں دختر
ہاں زینب و کلثوم و رقیّہ زہرا
عفت کی سند بن گیا انکا دستور
عورت کے تقدس کا نصیبہ زہرا
وہ برج طہارت کے افق پر روشن
ہر دور میں اک نیـّرِ تازہ زہرا
اللہ و رسول انکی رضا میں راضی
رکھتی ہیں عـجب شانِ رفیعہ زہرا
تفسیـرِ پیمبر ہوا ان کا کردار
ہیں مظہرِ اوصافِ خدیجہ زہرا
جنت کی ضمانت ہے اطاعت انکی
ملت کی ہدایت کا سفینہ زہرا
وہ نام ، اجابت کی سند کا حامل
تکمیل ریاضت کا وظیفہ زہرا
جو فقر ، گداؤں کوسکندر کردے
اس فقر کی دنیا کی امیرہ زہرا
مہکے ہیں سبھی باغ شرافت ان سے
گلـزار طہـارت کی شمـیمہ زہرا
اس ذات پہ ہے صبر کی دنیا نازاں
ایثار و سخا میں ہیں وحیدہ زہرا
نا پیـد ہے کونیـن میں انـکا ثانی
ہر رنگ میں ہیں سب سے فریدہ زہرا
اُس بحر سے نکلے ہیں حیا کے موتی
ہیں گـوہر عفـت کا خـزینہ زہرا
دارین کی عزت ہے محبت انکی
ہیں فضل الٰہی کا ذریعہ زہرا
اب اورشَرَف ،، فکر مری کیا سمجھے
خود ذات پیمبر کی ہیں بِضعہ زہرا
اک سجدےمیں اک رات بھی چھوٹی پڑجائے
صد رشکِ جبیں ہے ترا سجدہ زہرا
کاشانۂ تطہیـر ہے ،، تیرا آنچل
ہیں جسمیں سجے گوہر تقویٰ زہرا
ہےایسی بلندی،تری "خاکِ پا” میں
افلاک بھی ہیں جسپہ خمیدہ زہرا
کم ہوگی نہ تا حشر ضیائے سیرت
پُرنور رہے گا ترا رستہ زہرا
کیا اسکو بجھائے گی ہوائے باطل
ہے شمعِ حیا پر ، ترا پہرا زہرا
قرباں ترے اعزاز پہ ساری خلقت
خالق کے ہیں مظہر، ترے بابا زہرا
گر عمر کی ہر سانس قلم بن جائے
لکھ پاؤں نہ میں تیرا قصیدہ زہرا
اب رکھتاہےیہ کہہ کے فریدی،خامہ
بے مثل ہے ، اک اک ترا لمحہ زہرا
******
