آبروے اہل حق ، نازش ایوان سخن، پیکر استقامت، سلطانِ نعت گویاں ، مجاہد آزادی 1857ء حضرت علامہ سیدکفایت علی کافی مرادآبادی علیہ الرحمہ کی بارگاہ میں نذرانۂ عقیدت
سخن کی آبرو ہے "دار” پر نغمہ کفایت کا
شجاعت کی اذاں ہے وہ لب و لہجہ کفایت کا
جدا ہے شان اُس مستانۂ عشق رسالت کی
حیات نو ہے ملت کے لیے ، جذبہ کفایت کا
فنا کی حد سے باہر ان کی خودداری کا ہے جوہر
لباسِ موت میں کردار ہے زندہ کفایت کا
ترانہ عزم و ہمت کا لکھا، پھانسی کے پھندے پر
شہید کربلا سے ملتا ہےشجرہ کفایت کا
تبسم کر کے جس دم موت کی زنجیر پہنی ہے
عدو کے دل کو مردہ کرگیا جلوہ کفایت کا
سلاموں کے گہر ، اُس مردِ حُر کی استقامت پر
شجاعت خیز ہے اب تا ابد قصّہ کفایت کا
لہو دے کر زمینِ ہند کو گلزار فرمایا
شہیدانِ وطن میں رنگ ہے اعلی کفایت کا
خدا کی رحمتیں، دین و وطن کے اُس مجاہد پر
گلِ آزادی ہے ، ہر ایک نقش پا کفایت کا
ضمیر اپنا نہ بیچا ، حق پرستی پر رہے قائم
اصولِ رہبری کا چرخ ہے ، رستہ کفایت کا
چراغ حق نوائ لے کے طوفاں کو ہزیمت دی
نشانِ جرأت حسنین ہے اسوہ کفایت کا
کہا "سلطانِ اہلِ نعت” اُن کو اعلیٰحضرت نے
نبی کے عشق سے روشن ہے یوں خامہ کفایت کا
رقم ہیں بلبل و گل کی زباں پر عظمتیں ان کی
نہ کم ہوگا دیار ہند سے چرچا کفایت کا
چلو ہم ان کی سیرت کو بنائیں مشعلِ ہستی
تَنِ فکر و عمل پر اوڑھ لیں جامہ کفایت کا
وہ تیور جس سے کٹ جاتی ہیں مایوسی کی زنجیریں
فریؔدی منتقل ہو قوم میں ورثہ کفایت کا