جہانِ خسرو

طوطئ ہند ، بحرِ علوم و معارف ، مَلکُ الشعراء ، امیر الأدباء ، ماہرِ أَلسِنَہ ، موجدِ اصنافِ کثیرہ ، سندِ اہلِ زبان ، خلیفۂ حضرت نظام الدین اولیاء ، زینتِ مجالس اصفیا ، نقیب راہ تصوف و طریقت ، امینِ تہذیب و ثقافت ، مقبولِ انام ، فخر اہلِ حق حضرت خواجہ امیر خسرو چشتی نظامی علیہ الرحمہ کی بارگاہ میں نذرانۂ عقیدت
عرس پاک 19، 20 شوال المکرم

روحِ فَرہَنگِ سخن ، رنگِ زبانِ خُسرو
مکتبِ شعر و ادب ، طرزِ بیانِ خسرو

اُنکی ہستی ہےکمالوں کی مُجسَّم تصویر
ہےقلمدانِ مَعارف،دل و جانِ خسرو

طوطئ ہندکےنغموں پہ فدا،فن کےطُیور
سوز اور ساز کا سنگم ہے لِسانِ خسرو

اثر انگیز تکلُّم ، ادب آمیز کلام
کیف ومستی کا ترانہ ہے فُغانِ خسرو

اُس قلندرسےہوئ بزمِ ریاضت بیدار
گونجی ایوانِ تصوف میں اذانِ خسرو

وہ نسیمِ سحری ہیں، پَئے گلزارِ فُنون
شاخ در شاخ مزیّن ہے نشانِ خسرو

نہ کُھلا اب بھی فُسوں اہلِ نظر پر اُنکا
چرخِ اعجاز کا سورج ہے مکانِ خسرو

ساز و آواز کا پیمانہ ہیں جس کی لہریں
ہے تَنوُّع سے بھرا، بحرِ روانِ خسرو

اُس اَتالِیقِ روایاتِ اخوّت کو سلام
رہنما آج بھی ہے عزمِ جوانِ خسرو

ماہرِ أَلسِنَہ، اور موجدِ اردو وہ ذات
منفرد لعلوں سےلبریز ہے کانِ خسرو

جیسےقطرےسےہم آغوش ہو سارا دریا
قرب ایسا ہے، نظام اور میانِ خسرو

آسمانوں میں کیا جاتا ہے چرچا اُن کا
ہیں کہاں خاک نشیں مرتبہ دانِ خسرو

مثلِ پروانہ مچلتی ہےعقیدت جس میں
عشق وعرفاں سےچمکتاہےجہانِ خسرو

لاکھ کوشش کی فریؔدی نےمگر آ نہ سکا
حدِّ تحریر میں اک شَمّۂ شانِ خسرو