رمضان المبارک ، مسجدوں سے دوری اور ظلم و تعصب سے بھرے موجودہ حالات میں مومنوں کے دل کی آواز
اِس بَرَس آئ نہ پہلی سی خوشی رمضان کی
یاد آتی ہے ہمیں وہ تازگی رمضان کی
دل میں ہے رنج و اَلَم اور آنکھ ہے اشکوں سے تر
ماہِ رمضاں اور خالی خالی ہیں مسجد کے در
یا الٰہی رحم فرما مومنوں کے حال پر
کھول دے پھر ہم پہ راہیں اُس در ذیشان کی
یاد آتی ہے ہمیں ۔۔۔۔۔
مومنوں کا امتحاں مقصود ہے معبود کو
یہ وبا اک قہر ہے ہر ظالم و مردود کو
اشکِ توبہ کھول دیں گے رب کے باب جٗود کو
وردِ اِستِغفار ہے اک روشنی فیضان کی
یاد آتی ہے۔۔۔۔۔۔۔
ایک ضربِ قہر سے سارا زمانہ ہِل گیا
خاک میں سارا تکبر حاکموں کا مل گیا
عیش کی کشتی لُٹی، آرام کا ساحل گیا
جُھک گٸ قدرت کے آگے پھر جبیں انسان کی
یاد آتی ہے۔۔۔۔۔۔۔۔۔
جلوۂ رمضاں ہے اور ہم مسجدوں سے دور ہیں
آہ اے مولٰی مدد کر ہم غموں سے چور ہیں
سب کو راہِ وصل دے جو ہجر سے رنجور ہیں
لوٹ آۓ دلکشی محراب اور دالان کی
یاد آتی ہے ہمیں ۔۔۔۔۔۔۔
تنہا تنہا ہے تراویح و عبادت، کیا کریں ؟
یہ تمنا ہے کہ ہم سب مل کے پھر سجدہ کریں
جیسے کرتے آۓ تھے ہر سال، پھر ویسا کریں
مسجدوں میں ہم سنیں پھر نغمگی قرآن کی
یاد آتی ہے ہمیں ۔۔۔۔۔۔
قید میں مظلوم ہیں، ظالم کو ہیں آزادیاں
شَر کھلا ہے اور لگی ہیں خیر پر پابندیاں
پرورش فتنوں کی ہے اور امن پر ہیں سختیاں
رُت بدل جاۓ الٰہی میرے ہندوستان کی
یاد آتی ہے۔۔۔۔۔۔۔۔۔
ہر طرف آہ و فغاں، روتی بِلَکتی زندگی
ظلم کے شعلوں پہ بیکس کی سُلگتی زندگی
نفرتوں کے زخم، بہتا خوں، سِسَکتی زندگی
دُور کر مولٰی یہ ساری کیفیت خلجان کی
یاد آتی ہے۔۔۔۔۔۔۔۔۔
دیکھ لینا ! ظلم خود ظالم کو ہی تڑپاۓ گا
ایک اک قطرہ لہو، بن کر سمندر آۓ گا
جسمیں تخت و تاج پتوں کی طرح بہہ جاۓ گا
پھر گھڑی آۓ گی رونے والوں کے مسکان کی
یاد آتی ہے۔۔۔۔۔۔۔۔
سرزمین ہند سے نفرت کے شعلے ختم ہوں
مسکراۓ یہ چمن، دکھ درد سارے ختم ہوں
امن کے ماحول پر فتنوں کے حملے ختم ہوں
یہ دعا قلبِ فریدی کی ہے اور نعمان کی
یاد آتی ہے ہمیں ۔۔۔۔