احساس جدائ اشک عقیدت

ابھی اور ٹھہر اے مہ رمضاں
از فریدی مصباحی

تو ہم میں ابھی اور ٹھہر اےمہِ رمضاں
اتنی بھی نہ جلدی سےگزر اےمہِ رمضاں

جائے نہ مرے دل سے کبھی تیری تجلی
تو ڈال دے اک ایسی نظر اے مہ رمضاں

ہوتیری جھلک سیرت و کردار کے اندر
آنکھوں میں سما ! دل میں اُتَر، اے مہ رمضاں

حسرت سے تجھے چشمِ وفا دیکھ رہی ہے
خم ہےترے اعزازمیں سر اے مہ رمضاں

ہم کرنہ سکے کچھ بھی تری شان کے لائق
روتا ہے جدائ سے جگر اے مہ رمضاں

شرمندہ کھڑے ہیں تری دہلیز کے آگے
خاموش زباں، دیدۂ تر، اے مہ رمضاں

ہم جیسے نکموں پہ یہ احسان ہے تیرا
تو بن کےکریم آیا ہے گھر اے مہ رمضاں

ہیں اشک ندامت ہی مرے طشت عمل میں
کردےمرے اشکوں کوگہر اے مہ رمضاں

آئندہ ملوں تجھ سے یہ معلوم نہیں ہے
توچھوڑکےجامجھ پہ اثر اے مہ رمضاں

توحُسنِ عمل کی ہمیں خیرات عطا کر
سیدھی رہےسیرت کی ڈگر اے مہ رمضاں

تقوٰی مری فطرت میں سما جائے کچھ ایسا
ہر وقت ہو اللہ کا ڈر اے مہ رمضاں

سوکھا ہے مرا گلشن جاں قحط عمل سے
شاداب ہوں نیکی کے شجر اے مہ رمضاں

لایـا ہـے تـو پـروانـۂ آزادئ دوزخ
ہےمخزن بخشش ترا در اے مہِ رمضاں

محشرمیں نہ رکھناہمیں محروم شفاعت
اے چرخِ مروت کےقمر اے مہ رمضاں

بندوں کو دیا تو نے شب قدر کا تحفہ
بے شک ہے یہ اعزاز بشر اے مہ رمضاں

ہـے تیـرا افـق جـلوۂ قـرآں سـے منور
تو ہے شب عالم کی سحر اے مہ رمضاں

مل جائےترےدر سےہمیں "بدر” کا صدقہ
ہم زیر سے ہو جائیں زبر اےمہ رمضاں

راتیں تری انمول ہیں دن تیرے ہیں بے مثل
قربان ہےسب دولت و زر اےمہ رمضاں

گرتونےعنایت کی نظر  ڈال دی مجھ پر
مٹ جائےگا دوزخ کا خطر اے مہ رمضاں

ہیں تیری عطاؤں سے گنہگار بھی سیراب
توخلد کرم کا ہے ثمر اے مہ رمضاں

مجھ کو تری آغوش کریمہ ہو میسر
جس وقت ہودنیاسےسفر اے مہ رمضاں

جو عمر بچی ہے وہ بھلائ میں گزر جائے
نیکی سےسجے دل کا نگر اے مہ رمضاں

جل جائے نہ اک روز مرا خرمن ہستی
ٹھنڈےہوں گناہوں کےشرر اےمہ رمضاں

کرتا رہے تقسیم ضیاء جس سے فریدی
پیمانۂ فن نور سے بھر اے مہ رمضاں

رمضان المبارک کے خصوصی کلام