منقبت در شانِ گُلِ چمنستانِ رضا ، مخزنِ فیوض و برکات، محسنِ اہل سنت، نواسہ و فیض یافتہ حضور مفتی اعظم ہند حضرت علامہ مفتی خالد رضا خان علیہ الرحمہ بریلی شریف
کردار ترا مفتی اعظم کی کرامت
اے خالد ملت
پھر کس لیے چمکے نہ ترا گوہرِ سیرت
اے خالد ملت
کیا رنگ ملا ہے تجھے گلزارِ رضا سے
روشن ہے کمالوں سے تری سیرت و صورت
اے خالد ملت
جیسے شب تاریک میں مہتاب کا جلوہ
یوں غم کے اندھیروں میں تری چشمِ عنایت
اے خالد ملت
ہو کیوں نہ بھلا ناز ، ترے در کے گدا کو
پروانۂ اعزاز ہے یہ خالدی نسبت
اے خالد ملت
اے مسجدِ ایثار کے عابد، گُلِ "ساجد”
ہے تیری مہک، باغ کمالات کی زینت
اے خالد ملت
پوشاک و عمامہ تجھے پہنایا رضا کا
اِس شان سے دی مفتی اعظم نے خلافت
اے خالد ملت
اے شمعِ شبستان رضا، تجھ پہ فدا ہم
ملت کے ستاروں کا حرم ہے تری طلعت
اے خالد ملت
امجد علی اور نوری و سردار نے بخشا
اقبال سخن ، جامۂ فن ، تاجِ فراست
اے خالد ملت
ممتاز ہے تقویٰ میں ترا جوہرِ ہستی
خوشتر تجلی میں ترا گوہرِ حکمت
اےخالد ملت
دونوں ہی اجالوں کا تری ذات ہے سنگم
فیضانِ شریعت ہو کہ انوارِ طریقت
اے خالد ملت
اے مظہر اسلام کے بے مثل نگہباں
اِس باغ پہ اب بھی ہے ترا دستِ حمایت
اے خالد ملت
تنویر ترے اُنس کی ہے قلبِ اَنَس میں
ہے ان کے لہو میں ترے کردار کی رنگت
اے خالد ملت
آباد رہے شاد رہے تیرا گھرانہ
تاحشر برستی رہے اللہ کی رحمت
اے خالد ملت
تجھ پر ہو سلام اے شہِ کونین کے عاشق
معمور رہے فیضِ نبی سے تری تربت
اے خالد ملت
منظور ہو شاہا تری دہلیزِ کرم پر
لایا ہے فریدی جو یہ نذرانۂ اُلفت
اے خالد ملت